Kurti takon Von Cramonin! Flasin për marrëdhëniet ndërmjet Kosovës dhe Serbisë, pajtohën që marrëveshja e Ohrit të zbatohet shpejtë dhe pa kushtëzime

1 minute, 24 seconds Read

Kryeministri i Republikës së Kosovës, Albin Kurti, ka pritur në takim Raportuesen për Kosovën në Parlamentin Evropian, Viola Von Cramon, e shoqëruar nga shefi i Zyrës së Bashkimit Evropian në Kosovë, Tomáš Szunyog dhe bashkëpunëtorë të tjerë.

Në njoftimin e bërë për media nga zyra e kryeministrit thuhet se në takim Kurti dhe Cramon biseduan për zhvillimet në vend, me theks procesin e dialogut në Bruksel dhe marrëdhëniet ndërmjet Kosovës dhe Serbisë, dhe për procesin pas-zgjedhor në katër komunat në veri të vendit.

“Kryeministri rikujtoi se zgjedhjet në katër komunat në veri të vendit ishin shtyer një herë në dhjetor, dhe se tani pas mbajtjes së tyre me 23 prill, është e rëndësishme që të fillojmë sa më parë me ofrimin e shërbimeve bazike për qytetarët, të cilat kanë munguar që nga fillimi i muajit nëntor të vitit të kaluar pas dorëheqjes së kryetarëve pararendës. Ndërsa, për sa i përket dialogut të ndërmjetësuar nga Bashkimi Evropian dhe Marrëveshjes Bazike dhe Aneksit të Zbatimit të saj, ai përsëriti që duhet zbatim i shpejtë, i plotë dhe i pakushtëzuar”, bëhet e ditur në njoftim.

Kryeministri shtoi që është kënaqësi të pres Cramon në takim në këto kohë të rëndësishme dhe e falënderoi atë për përkrahjen për anëtarësim në Këshillin e Evropës dhe Bashkimin Evropian.​

Ndryshe, dy ditë pas zhvillimeve në veri, Policia ka konsideruar se situata është e qetë dhe nuk raportohet për ndonjë incident.

Publikime te ngjashme