Detaje të reja të masakrës nga ku mbetën gjashtë të vrarë në një shkollë në Nashville, publikohën pamjet e sulmit

1 minute, 41 seconds Read

Policia e Nashville ka publikuar disa pamje që thuhet se tregojnë momentin kur një sulmuese hyri në një shkollë para se të qëllonte gjashtë persona, duke përfshirë tre nëntëvjeçarë.

Sipas mediave të huaja, përcjell Telegrafi, Audrey Elizabeth Hale u qëllua për vdekje pasi u përball me policinë në shkollën private të krishterë.

Hale, 28 vjeçe, që u identifikua si transgjinor, u përshkrua nga zyrtarët si një “e vetmuar”, që jetonte në Nashville dhe ishte e armatosur me dy armë të tipit sulmues dhe një pistoletë.

Hale kishte një manifest dhe harta të detajuara të shkollës dhe hyri në ndërtesë duke qëlluar përmes dyerve të saj përpara vrasjeve.

Shefi i policisë John Drake tha: “Ne kemi një manifest. Kemi disa shkrime që po shqyrtojmë që kanë të bëjnë me këtë ditë, incidentin aktual. Kemi një hartë se si do të ndodhte e gjithë kjo”.

Siç vënë në pah mediat, oficerët filluan të merrnin raporte për një sulm në orën 10:13 dhe ndërsa policia kontrollonte katin e parë të shkollës, ata dëgjuan të shtëna armësh që vinin nga kati i dytë.

Dy oficerë nga një ekip prej pesë anëtarësh hapën zjarr si kundërpërgjigje dhe qëlluan për vdekje të dyshuarin në orën 10:27 (16:27).

Një motiv i mundshëm për dhunën me armë të Hale nuk dihet.

Ndërkohë ka ardhur edhe një reagim nga presidenti i SHBA-së, Joe Biden, i cili e quajti sulmin e së hënës “të sëmurë” dhe “zemërthyes”.

Ai tha se SHBA duhet të bëjë më shumë për të mbrojtur shkollat dhe i bëri thirrje Senatit të miratojë ndalimin e armëve sulmuese – që do të kriminalizonte shitjen, prodhimin, transferimin, posedimin ose importimin e ditur të shumë llojeve të armëve gjysmë automatike dhe “me kapacitet të madh”. /Telegrafi

Publikime te ngjashme